Kort am e SSW

For e politiik foon e SSW spaale da seelschaplike än poliitische önjtwiklinge önj Skandinoowien en grut rul. Sü koone we wichtie naie impulse for e politiik önj Slaswik-Holstiin düünj, wan et t. b. am årbesmårket-, sosjåål- än bildingspolitiik gungt.

E SSW stoont for en desäntråål politiik sü as önj da nordische lönje: Politiische önjtschiisinge schan sü bürgernäi drååwed wårde as möölik, än da bürgere schan e möölikhäid heewe, deer influs aw tu naamen.

Aw jüdeer grünlååge seet ham e SSW deerfor in, dåt da manschne önj üüs regjoon e möölikhäid hääwe, heer årbe tu finen än en gou laawen.

E SSW as sunt 1947 önj e loondäi önj Kil fertrin. Jarst as „Söödslawiksch Foriining“ än sunt 1948, as e partäi grünläid wörd, as SSW. Foon 1971 bit 1996 sätj Karl Otto Meyer as „ån-moon-fraksjoon“ for e SSW önj e loondäi. Sin grut erfååring än sin riselfiird strääwen for demokratische wjarde måågeden ham uk bütefor foon Slaswik-Holstiin bekånd.

2012 wus e SSW fort jarst toocht önj sin histoori bai en loonsregiiring önj Slaswik-Holstiin bediiljid. Tuhuupe ma e SPD än e Bündnis 90/DieGrünen luket et e SSW önj e „küstekoalitsjoon“ mör as 100 foon sin woolferspreegen amtuseeten. Deertu hiirden t. b., dåt da dånsche schoule önjt schöljgesäts än önj e loonsferfooting likstald wörden tu da öfentlike schoule. Önjt regiiringskabinet wörd Anke Spoorendonk foon e SSW minister for justiits, kultuur än Europa. Önj har åmtstid reformiird jü et gesäts fort schöölen foon üülje bagninge, fjard et jarst loonsgesäts for biblioteeke in än sörid for mör stipe önj e kultuurberik.

2022 füng e SSW 5,7 prosänt foon e stime, wat dåt beest riseltoot bai en loondäiswool wus, sunt e partai 1948 grünläid wörd. Önj e 20. slawik-holstiinsche loondäi (2022–2027) as e SSW ma fjouer loondäismanschne fertrin: Lars Harms, Jette Waldinger-Thiering, Christian Dirschauer än Sybilla Nitsch. Fort jarst tooch stalt e SSW uk iinj foon da tweede loondäispresidänte. Di båntje heet Jette Waldinger-Thiering.

Ma sin amenbai 3.150 lasmoote as e SSW önj Slawik-Holstiin e fiird grutst partai.

E SSW spaalt uk aw e komunååle schuchte önj Slaswik-Holstiin en gruter rul. E partai stalt traditsjoonäl bai da komunåålwoole önj da tra krise Slaswik-Flansborj, Nordfraschlönj än Randsborj-Eckernförde kandidoote ap än uk önj da krisfrie stääse Flansborj än Kil. Bai dadeere woole fäit e partai önj da nordlike komuune tum diilj mör as 20 % foon da stime.

2023 köm e SSW bai e leest krisdäis- än gemiindewool sügoor aw en döörsnit foon ouer 20%. Dåt wus en rekord än südänji sate tutids amenbai 260 komunåålpolitiikere foon e SSW önj da ferträäsinge foon 63 gemiinde än stääse.

For ålem önj da gemiinde långs e gränse hääwe we en stark positsjoon, weer we bit tu 40% foon da wäälere fertreese.

2021 as e SSW fort jarst tooch wider sunt 1961 bai en wool for e tjüsche bundesdäi önjtrin. Än ma ouer 55.000 stime luket et matiinjs en sat önj Berlin tu fouen. Deer seet ham di naie SSW-bundesdäimoon Stefan Seidler for ålem for da inträse foon da manerhäide in än for Slaswik-Holstiin. Hi utert ham ouers uk tu oudere aktuäle än seelschaplik wichtie teeme.