SSW-Deät Lunn ÜÜS MÜÜLJE
Rüm Hart – Kloar Kimmen as en üüljen sprööke, wat uk for di SSW-Deät Lunn jült. We hüle fåst bai e brökedhaid foon dåt ailönj Deät Lunn. We wan üs hiisi wirtschaft stääwie, derma da mansche aw e äilönj en sääker tukamst heewe koone. We san im for naie schangse än idee, wat ai di tuurismus tu låst fåle, ouerdåt we deraw önjwiset san.
Di SSW wal dåt bürgere önj tukamst bai wichtiie önjtschiisinge bediiligd wårde. Önj tide weer we üs ålten mör eefter büten ruchte, as et wichtii ham aw da äine rödje än wjarde tu besane. Ökoloogische tuurismus, ruchtfjardie lüünje än schööl foon iiremoole wat dåt laawen foon da manschne önjpåst as, san üs müülje. We wan önj en solidariisch seelschap laawe
Dåt laawen iip Deät Lunn
Di SSW stipet da ploone am jü grünleeding foon en hiisi tuhuupesliting for dåt bagen foon booge. Da booge foon jü gemiinde än da foon jü bundesönjstålt for imobiliieapgoove (BIMA) wårde sü uner ån tååge tohuupefjart, derma jü lii läich blaft. Grün wer huum möölik naie booge bage kö, schal unersicht wårde än da ruchtlike forütseetinge schåft wårde. We tånke, dåt uk e loonsregiiring sin plachte eefterkaame schal, ouerdåt Slaswik-Holstiinj jüst en sosjåål program for dåt bagen foon booge apseet heet.
Di SSW begröötet da ütwidete tide foon e bjarnetün for ladje bjarne (Kita) önj da harfstfeerie än ouer jü madistid. Dåt bagen wat nuch ütstuunt stipe we, derma dåt gou tubood baibehüüljen wård. Di SSW strääwet deerfor, dåt hum önj tukamst for e kita ninte betåle schal. Bit derhaane wan we de läige baidråch behüülje.
Di SSW stipet da ploone, weer hum ma heelp foon e-learning än oudre möölikhäide jü 11. bit tu e 13. klas foont gymnasium for e James-Krüss-schölj inruchte koon. En gou möölikhäid am ma da ploone ingungtukaame as dåt tohuupeårben ma da oudre nordfrasche äilönje. Önj da skandinoowiske lönje as dåt liiren döör e-learning reåål, südåt hum ham da liirmetoode önjt interneet aw Slaswik-Holstiinj ourdreege koon.
Üs seelschap wård åler, deram schal hum derfoor sörie dåt et nooge booge jeeft, wer aw da üülje mansche afpååst wård. Booge tu bagen wat da üülje manschne önjpååst san, as derma en swoorpunktteema for e SSW. Et koon ai weese, dåt da ålere inboogere foon e äilönj wachgunge schan.
Di SSW stipet di forsliik dåt hum aw Deät Lunn wider sin bjarn tu wrååls bränge koon. We siie et as en sliks „grünrucht“ dåt hum aw Deät Lunn tuläid wårde koon. We wase urs uk hü swoor et ward, dåt dörtuseete.
Da prisinge for strum, wårmd, wååder än föölwååder san önj da leeste iirnge gau steegen. Dåt heet maning grüne. Di SSW strääwet deerfor, dåt di pris for da ekstrakooste wider läiger wård. Döör dåt indoomen foon da hüsinge koon hum en diilj foon da haitsütjeefte inspååre, ouers dåt långd ai. Dåt måågen foon wårmd än drainkwååder schal önj tukamst suner ööle schaie, derma da ütjeefte ai åltu huuch wårde. Döör winjkraftwärke mödj di söödhuuwen ouers ai ütschiinjet wårde, ourdåt et dåt jarste as, wat hum schucht wan hum foon dåt fååstlönj kamt. Di SSW as for en klök liising, weer tum baispal jü energii foon en winjkraftwärk uk for wårmd njütet wård. Di SSW as ouers uk nailik än im for oudere möölike liisinge.
Årbe aw Deät Lunn
Di SSW as kritiisch inouer dåt tubood önj årbesplåtse. Da forütseete 150 årbesplåtse önj e offshore-industrii san bluts möölik önj e önjfång foon et bagen foon da winjkraftwärke, deerefter wård hum urs bluts nuch for en treedendiilj brååk heewe. Da årbesplåtse wårde jam ai for e gemiinde luune, ordåt da maårber bluts for en kort tid aw e äilönj årbe än deram ai eefter Deät Lunn fleete. Di tuurismus as jü wichtiist perspektiiwe önj e tukamst aw Deät Lunn. Teeme, wat önjt regjonåål ütwiklingskonzept ütårbet wörden san, schan for industiiprojekte gunge.
We wan dåt unersicht wård, weer grün for tuurismus njütet wörde kö än dåt da ruchtlike forütseetinge schåft wårde. Önj e luup foon e jü amfrååg am en bürgerönjtschiising "Bast dü for en lönjtuwåks dör en ferbining foon da binge ailönje foon Deät Lunn?“ – wat for e SSW önj e mal stoont – san maning mölikhäide önjdän wörden, sü as tum bispal dåt bebagen foon e Flaggenhügel boowen foon e berliner boor, aw e nordströnj bai e jöögedhärbärj, en kafee for et swumbåd bai e nordååsthuuwen, önj e kringel än bai e banehuuwen.
Da mååste bååsegååste, wat ofting tu Deät Lunn kame, besäke hål e dööne. Di SSW wal deram dåt tuuristische tubood aw e dööne hål stipe. Nütutids büt jü kurferwålting aw e dööne jü döönenfäär, dåt ferliien foon stroonkorwe, bååsemäistre bai e nord- än söödströnj, camping än dåt üülje än naie bungalowtoorp önj. Et as nüsi dåt we üs da bååsegeeste ma e tid ålten wider önjpåse. Da bååsegeeste wansche jam aw e dööne maning unlike tuboote as tum bispal miinigolf, fääringe, bålspale, dåt pååsen foon da bjarne, tuboote foor wåksne, boccia, schach än sü wider.
Dåt döönentoorp schal nuch wider ütbääget wårde än dåt schal widerhaane önj e öfentlik hönj foon e kurferwålting bliwe. Di SSW strääwet derfoor dåt da finansjäle madle derfoor fünen wårde.
Di SSW wal derfoor sörie, dåt di wåådersport önjdrawen wård, am bååsegeeste önjtuwirwe. Derbai schal hum uk derfor sörie, dåt hum ma sin säägelschap gödj önjleede koon. Am dåt projäkt tu betålen, schal ham Deät Lunn ai foon grutinvestore oufhängi mouge.
Derma di bååsebedrif wåkse koon, tånke we as SSW, dåt we modärner wårde schan. Modärner håt önj di tuhuupehång, dåt hum ham di bååsebedrif ålten wider nai önjpåst än derma aw anerte häiwe ingungt. Uurlaub wat or tri bit fjour wage gungt, jeewt et sü måst ai mör. Äiwendäis as et iir sü, dåt huum oftinger for en kort tid uurlaub namt. Mans di korte apenthüülj wan bååsegeeste hål önj maning berike stipe fün. Önj di berik as ål en mase schait, dåt tubood koon urs nuch ütwidet wårde, uk bütefor e hoodsäsong. Deät Lunn schal bai jü feranering sin iinmooli wääsen baibehüülje. Di SSW seet ham derfoor in, dåt da, wat jare feeriebooge fernaiere wan, önj tukamst stipe fue.
We san fernait derouer, daat we sunt da leeste iirnge maning bååsegeeste foon üs näiberlönje da Neederlönje än Dånsch aw üüs ailönj siin koone. Döör müüljruchted wirwen wal di SSW dåt ferhüülj tu üs näiberne stipe än wider ütbääge derdöör dåt hum tum bispal jü hüüsesid än prospäkte aw dånsch unti änglisch ouerseet. Ouer e fölkhuchschölj schönj önj da wuntermoune sprääkekurse önjbin wårde, derma we da bååsegeeste aw jare mamenspräke begrööte koone.
Bai e bååsebedrif kamt et uk aw da latje käre aw önj. Dåt koon tum bispal der ma tuhuupehånge hü riin da stroote ön plåtse san, weer da maårber foon e kurferwålting än önj da loodne wanlik san än uk hu luut dåt läis foont bagårbe önj e hoodsäsong as. We fine uk dåt dåt haitsen ma huult än koole döör fiirwårmd ütprunget wårde schöl.
Fritid än ferkiir aw Deät Lunn
Jü ütschriwing foon en ferbining mat schap tu e di fååstewål ouert gånse iir ward nuch jarling foon e gemiindefertreesing öntschiiset. Dåt gilj derfoor kamt diils foon öfentlike madle än tum diils foon e loonskas urs uk foon e gemiinde, derma jü gemiindefertreesing bai e fåårploon maschnåke koon. Di SSW ward ham derfoor inseete, dåt di fåårploon da wansche foon da hiisie än da bååsegååste önjpåst as.
Önj e näist tid wård et nüsi, dåt en nai döönenfäär önj gung seet wård. Üs as et derbai wichtii, deeraw tu åchten, dåt dåt schapmodäl energii spåårt än gödj for e amwråål as. Di SSW as derfoor, dåt di fåårploon ütwidet wård.
Dåt itbooate foon da bååsegååste aw Deät Lunn as iinmooli än deram wan we et hål baibehüüle. En nai siibru weer da schaawe önjleede koone, wård et sü as et nå ütschucht ai önj da naiste tiin iirnge jeewe, derma san we aw da „börte“ önjwiset. Di SSW ward ham deeror tuchte mouge hü hum deerfor sörie koon, dåt da büütje dåt gånse iirs beseet san.
Di SSW begrööted än stipet jü initsjatiif, wat foon da inboogere ütgungt, än ham derfoor inseet dåt et wider en kiino önj e nordsiiehale jeeft. Dåt bispal wiset, dåt ham iirenåmtlik årbe for da hiisie foon Deät Lunn as uk da bååsegeeste lunt än wat derdöör schåft wårde koon. We wan derma uk åål da, wat iirenåmtlik årbe en grut loof düünj. Suner jare inträäsen wör dåt lawen aw Deät Lunn maner spoos mouge. Uk ouer oudre alternatiiwe möölikhäide sin fritid tu njüten, heet di SSW önj e lök, tum bispal jü käägelboon önj e nordsiiehale tu fernaiere. Uk for da, wat ja ai sü ütkåne ma et käägeln, mout et nån spoos mör aw da boone tu spalen. We wansche üs 2-3 bowlingboone in stä foor da üülje boone. Da boone wörde wäl oftinger njütet wårde. Dertu kamt, dåt hum da boone uk ütliine koon tu da bååsegeeste.
Di SSW as ai jü iinjsist partai wat am di bag foon en standard sporthal betoocht as. Jü sporthal bai e schölj önjtspreeged ai mör e norm. Döör en modärn sporthal wart Deät Luun intresanter for oudre sportferiine än schöljmoonschape. Di SSW stipet initsjatiiwe, wat jam deram kumre wan! Sport ferbant üs maenouder än uk heer koon Deät Lunn ai bluts ma san tuurismus ouertjööge.